✍️ Undirritun að veruleika
Stærstu fréttir vikunnar voru klárlega undirritun samkomulags milli sveitarfélaganna á höfuðborgarsvæðinu og Ríkisins um samgöngumál. Þetta er verkefni sem er búið að vera í undirbúningi í lengri tíma og því mikill léttir að sjá það staðfest svart á hvítu. Hugmyndin um aukna fjárfestingu í breiðu samgönguframboði og mun aukin áhersla á hagkvæma samgöngukosti svo sem almenningssamgöngur og hjólreiðar hefur hins vegar verið svo inngróin í alla þróun Reykjavíkurborgar undanfarinn áratug að önnur útkoma hefði virkað fráleit. Það er því erfitt að finnast annað en að hin augljósa lausn hafi orðið ofan á, a.m.k. fyrir okkur sem höfum fylgst með og tekið þátt í umræðunni undanfarin ár.
Helsti sigurinn fyrir samgöngu- og skipulagsumræðuna er að Degi B. Eggertssyni hefur tekist með ótrúlegri þolinmæði, þrautseigju og pólitískri lagni að sveigja umræðuna inn á skynsamlega braut og fá alla að borðinu til að semja um það hvernig sé best að haga samgöngupólitík Höfuðborgarsvæðisins næstu áratugina. Hugmyndafræðin sem var innleidd í Aðalskipulagi Reykjavíkur 2010-30 hefur smitast yfir á Höfuðborgarsvæðið allt. Dagur myndi kannski ekki gangast við því að hafa verið upphaf og endir þessarar vegferðar, því hann hefur viljað gefa öllum hlutdeild í útkomunni og breið samstaða þvert yfir pólitík og landafræði hafa verið einkennisorð þessa verkefnis. En það er alveg ljóst að án Dags hefði þetta samkomulag aldrei orðið og aldrei með þeim áherslum sem í því eru.
🚎 Borgarlínan er hryggjarstykkið
Kjarninn í samkomulaginu fyrir fasteignir og þróun byggðar er auðvitað Borgarlínan. Á því hanga fjöldi þróunarverkefna um alla Reykjavík sem geta ekki komið til framkvæmdar nema með hágæða almenningssamgöngum. Fjárfestar í þeim verkefnum geta því andað léttar og haldið áfram sinni vinnu af öryggi. Vegahlutinn í samkomulaginu eru einhverjar lagfæringar á vegstubbum hingað og þangað og fátt sem byggir á einhverri heildarsýn um samgöngupólitík í því sýnist manni. Garðabær fær að vísu inn stokk sem er hryggjarstykkið í áhugaverðu þéttingarverkefni miðsvæðis þar og mikilvægur þáttur í að tengja saman frá Sjálandshverfi að miðbæjarsvæðinu og fría þannig land til uppbyggingar. Sæbrautarstokkurinn sem gefur tengistöð Borgarlínu stað við Vogabyggð og tengir hana Vogahverfinu er líka risavaxið verkefni.
📃 Sundabraut til einkaaðila - enn og aftur
Það er merkilegt að Sundabraut er enn einu sinni skilin eftir og ekki mikil áhersla á hana af hendi Ríkisins virðist vera. Það er talað um að fá einkaaðila að verkefninu. Ég man ekki betur en að einkaaðilum hafi síðast verið boðið að taka þátt í því verkefni með nokkurri viðhöfn af Hönnu Birnu Kristjánsdóttur fyrir sex árum síðan og það boð staðið opið síðan án þess að nokkur hafi viljað þekkjast boðið. Hvað eigi að breytast nú til að vekja áhuga fjárfesta ef nokkuð liggur ekki fyrir.
Veggjöld sem kynnt voru í samgönguáætlun koma fram í samkomulaginu og er þá byrjað að tala um þrengslaskatt eða tepputolla í því samhengi nú. Þetta hefur alltaf legið í loftinu því Dagur hefur byggt mótun þessa verkefnis á norska umhverfispakka módelinu. Þar er veggjöldum beitt til að breyta ferðavenjum og fjármagna fjárfestingar sem auðvelda breytingar á ferðavenjum.
📐 Ekki skipulagsmál?
Það var vakin athygli á því að enginn fulltrúi Ríkisins sem hefur með skipulagsmál að gera hefur komið að þessu samkomulagi, til dæmis var forstjóri Skipulagsstofnunar alveg fjarverandi undirbúning og ekki með hlutverk í útfærslunni. Ríkið hefur í sjálfu sér afskaplega lítið með útfærslu byggðaskipulags að gera og hingað til hefur að mínu mati ekki borið á miklu frumkvæði til að hefja umræðu eða móta með virkum hætti form byggðaskipulags í landinu síðan sveitarfélögin fóru að skipuleggja sig sjálf. Kannski hefur engum dottið í hug að spurja hvernig ætti að blanda Skipulagsstofnun inn í útfærsluna en hugsanlega kemur að því nú.
En Ríkið notaði nú samt tækifærið til að hafa áhrif á skipulagsmál í Reykavík með því að ýta á uppbyggingu á Keldnaholti. Ríkið á þessa stóru spildu í borginni og fjármálaráðherra hefur talað um það opinberlega að hann myndi vilja sjá Reykjavík byggja þar til að bæta í meintan framboðsskort á íbúðamarkaði og líklega ekki síður til að koma nokkrum aurum í kassann. En kannski var það frekar þannig að Borgin fékk Ríkið til að lofa að leggja Borgarlínuna þangað ef svæðið kæmi nokkurn tímann til þróunar.
Ef þú vilt segja mér hvað þér finnst um það sem ég er að skrifa, spurja spurninga eða leggja eitthvað til þá er einfaldast að svara bara þessum pósti.
Ef þú heldur að einhver sem þú þekkir hefði áhuga á að lesa þetta þá er best að framsenda bara póstinn til viðkomandi.
Ef þú vilt gerast áskrifandi og fá fréttabréf minnst mánaðarlega og yfirleitt oftar. Ýttu þá hér.