9 - Þróunarsvæði í borginni
Það er alltaf verið að vinna í að skipuleggja einhver svæði til framtíðar og það tekur mis mikinn tíma. Oft er það vegna þess að eigandinn er óviss eða að skipulagskonseptið nær ekki flugi meðal samstarfsaðilanna. Nú er eitthvað að gerast á einum umtöluðum reit.
💶Heklureitur til sölu
Það vakti athygli mína að sjá Heklureitinn í heild sinni auglýstan til sölu. Hann hefur verið í skipulagsferli um tveggja eða þriggja ára skeið og voru komnar fram tillögur sem mér sýndust vel framkvæmanlegar. Það fór mikið púður í að efna til skipulagssamkeppni og velja hugmynd sem færi vel að markmiðum Borgar og eiganda. Markmiðið var að umbreyta reitnum alveg úr því að vera fremur rýmisfrek atvinnustarfsemi yfir í að verða blönduð byggð íbúðarhúsnæðis, atvinnu og þjónustu. Yrki arkitektar unnu keppnina, meira um svæðið hér.
Síðar fór að heyrast af því að brösulega gengi að ná samningum milli þróunaraðilans og Borgarinnar. Svona verkefni kallar á miklar breytingar á borgarumhverfinu og endurfjárfestingu í innviðum sem Borgin vill ekki þurfa að bera ein auk þess sem mikið virði skapast fyrir eigandann við aukna nýtingu lóðanna. En það er líka mikilvægt fyrir árangursríka uppbyggingu Borgarlínu og fyrir markmið aðalskipulags Reykjavíkur að svona þróunarverkefni gangi eftir. Aftur á móti er þetta langt frá því að vera eini reiturinn sem það gildir um. Samningsstaðan er því ekki alveg augljós.
Hvort það að setja reitinn á sölu sé tilraun til að knýja fram aðra lotu í samningaviðræðum við Borgina eða bara uppgjöf eiganda fyrir verkefninu liggur ekki alveg fyrir. En það var einhver örvæntingablær á auglýsingunni því það var lítið gefið upp nema að húsnæði Heklu væri til sölu og að óskað væri tilboða. Ekkert um þróunarmöguleika eða að til væri skipulagshugmynd fyrir reitinn. Sem sagt bara tilkynning en ekki mjög sölulegt. En eigandi Heklu er ekki eini hagsmunaaðilinn heldur eru Reitir eigendur að Gamla Sjónvarpshúsinu og hafa haft í hyggju að breyta því húsi í Hótel. Sú uppbygging hangir á umbreytingu þess sem nú er til sölu. Reitir gætu svo sem keypt restina af reitnum og náð stjórn á verkefninu og eignast heilan banka af þróunarlóðum til framtíðar. En ef salan er bara blöff er líklega ekki mikil gleði með þessar vendingar þar á bæ, ímynda ég mér. Svo er kannski ekki mikil pressa á að byggja hótel akkúrat núna.
Reitir eru annars á mikilli siglingu með þróunarreiti í borginni nú um stundir og bera þar hæst miklar breytingar á Kringlureit sem og þróun Orkureitsins við Suðurlandsbraut. (Rétt er að geta þess að VSÓ Ráðgjöf, vinnustaðurinn minn, er ráðgjafi Reita í þessum tveimur verkefnum.) Þessir staðir eru báðir mikilvægir fyrir framgang markmiða Aðalskipulags Reykjavíkur og Orkureiturinn nokkuð mikilvægur fyrir fyrsta áfanga Borgarlínu.
Molar úr fundargerðum Skipulags- og samgönguráðs
Hér eru þrír áhugaverðir punktar af 73 málum sem Skipulags- og samgönguráð Reykjavíkurborgar tók fyrir 14. ágúst síðastliðinn.
🎠Ekki lengur hótel heldur íbúðir
Svæðið sem því miður heitir alltaf Byko reitur því Byko var þar um stund en gæti heitið Gullströndin, hefur verið í breytingarferli um hríð. Þar var síðast ætlunin að byggja hótel og nokkrar íbúðir. Nú hefur eigandinn ákveðið að íbúðauppbygging sé vænlegri kostur og sækist eftir að fá að reisa 84 íbúðir í stað 70 áður. Mér sýnist formið ekki mikið breytast en aðgangur að bílakjallara verður bara frá Hringbraut í stað Sólvallagötu. Saman með væntanlegri þróun á reitnum við Seljaveg/Mýrargötu er því von á töluverðri fjölgun íbúða á svæðinu auk þess sem Landhelgisgæslureiturinn gæti komið til uppbygingar. Þetta eru skýr merki um breyttar áherslur í uppbyggingu: íbúðir í stað hótela. Sjá hér.
🏭Nýjar lóðir fyrir atvinnustarfsemi
Um árabil hefur staðið til að byggja upp atvinnusvæði norðan við Suðurlandsveg, uppi á Hólmsheiði. Fyrstu áfangarnir má segja að séu fangelsið og tengivirkið sem fyrir eru. Síðast var gerð atlaga að þróun þessa svæðis fyrir meira en áratug þegar þáverandi borgarstjóri var búinn að krota nöfn ákveðinna fyrirtækja á lóðirnar en ekkert hafði frést af útboði eða almennri auglýsingu ef ég man rétt. Þá var ætlunin að þetta svæði myndi koma í stað Hálsa-svæðisins minnir mig.
Fyrir um 8 árum var svæðið líka til umræðu og þá var ekki alveg búið að negla staðarval fyrir fangelsið og ég var mjög áhugasamur um að Álfsnesið yrði frekar fyrir valinu og þar yrðu iðnaðar- og athafnalóðir í meira umfangi og Sundabraut sem þá var líklega í umræðunni sem endranær, myndi þjóna svæðinu. En Sundabraut er ennþá bara efst á umræðulistunum og fangelsið fékk annan stað. Hins vegar er athafnasvæðið við Esjumela allt að koma til.
Nú á að bjóða 29 lóðir á 60 ha svæði austan við borgina. Þar af eru reyndar 38% skógur og 18% vegir og opin svæði. Alls er byggingamagnið um 73.000 fermetrar. Það er tvennt sem ég myndi helst hafa áhyggjur af við þessa þróun, líkt og umhverfismatið tilgreinir líka en það eru samgöngur við svæðið og svo vatnsverndin sem þarf virkilega að vanda sig við. Hins vegar þarf að finna til atvinnusvæði ef það á að vera hægt að endurþróa vannýtt atvinnusvæði, svo keðjuverkunin er töluverð. Sjá skipulagið hér.
👩🎓Sátt um viðbyggingu við Gamla garð
Nú virðist hafa náðst sátt um umdeilda viðbyggingu við Gamla garð með einhverjum tilfærslum á byggingarreit. Tillagan var auglýst í sumar og bara ein athugasemd barst. Mér sýnist að breytingin feli í sér að það sjáist meira í Gamla garð frá Hringbrautinni. Það vekur reyndar athygli mína að ekki er fjallað um fjölda íbúða eða íbúðarherbergja í skilmálunum og auðvitað á eftir að hanna sjálft húsið eða það liggur amk ekki fyrir hvernig verður.
Ef haldið er áfram á sömu braut og var þá verða þarna íbúðarherbergi með sameiginlegu eldhúsi, nokkuð sem ég lagði töluverða áherslu á að vantaði þegar ég var í byggingarnefnd FS. Það form hentar vel mörgu fólki sem er að taka sín fyrstu skref að búa sjálfstætt, þeim sem vilja spara eins og mögulegt er í húsnæðiskostnaði og auðvitað þeim sem ætla að dvelja í skemri tíma. Á undanförnum áratug hefur orðið til alveg nýtt háskólasvæði kringum Vísindagarðana og auðvitað með tilkomu Háskólatorgs. Sú umbreyting að fá Háskólatorg ein og sér ætti að vera í kennslubókum um umbreytingarkraft arkitektúrs en skólinn er allt annar og betri á eftir. Nú er orðið til háskólaþorp inni í borgini sem ég held að hljóti að vera mjög huggulegt að dvelja í um hríð.
🐏Hvernig notar landbúnaðurinn landið?
Ólafur Arnalds segir frá merkilegum viðskiptum sínum við MAST um aðgang að upplýsingum um hver þiggi greiðslur fyrir búfjárhald. Ég hef lengi velt fyrir mér hvar þessi gögn séu, um hvaða bæir þiggi greiðslur og hversu mikið og fyrir hvað. Kemur bara á daginn að MAST taldi að upplýsingar um hvað ríkið borgar fyrir landbúnað væri eitthvað prívat mál sem fólk ætti ekkert að vera að hnísast í. Það hefur nú verið leiðrétt. Bretar hafa til dæmis opna leit þar sem er hægt að fletta þessu öllu upp á sérstökum vef CAP Payments.
Þetta eru vitaskuld mjög mikilvægar upplýsingar sem geta sagt okkur mikið um það hvort okkur finnist við vera að fá það sem við viljum fyrir niðurgreiðslur. Ekki síður segir þetta mikið um það hvernig er verið að nota landið okkar. Ég gæti trúað að uppsetning á þessum upplýsingum á korti myndi hjálpa mikið til að skilja betur hvernig umfang landbúnaðar dreifist um landið.