6 - Lóðir og uppbygging
🚧Lóðir í Úlfarsárdal til sölu - aftur
Úlfarsárdalur er vettvangur mestu einstöku fjárfestinga Reykjavíkurborgar nú um mundir. Stóreflis hverfismiðstöð fyrir skóla, bókasafn, sundlaug og íþróttir er að rísa og gatnagerð stendur yfir á nýjum áfanga svæðisins við Leirtjörn. Engu að síður eru enn lausar lóðir í þessu hverfi og stendur nú yfir útboð á lóðum í einbýlis-, rað- og fjölbýlishúsum. Að stórum hluta er þó um að ræða íbúðir sem voru boðnar út í fyrrahaust. Ég tel að minnsta kosti 21 lóð er að koma til sölu að nýju. Markaðurinn fyrir lóðir virðist vera að kólna af því að dæma eða þá að erfiðlega gangi að fjármagna framkvæmdir. Það er mikið verið að byggja á sama tíma og verð stendur í stað, því er ekki ólíklegt að lánveitendur velti fyrir sér stöðunni og haldi aftur af framkvæmdum í bili.
Í útboðinu í haust var byggingréttargjald og gatnagerðargjöld á fermetra að meðaltali svo:
Einbýli - 34.450
Tvíbýli & raðhús - 36.250
Fjölbýli - 47.460
https://reykjavik.is/ulfarsardalur-lodasala-2019
🤝🏻Samstarf um hagkvæmt húsnæði
Reykjavíkurborg hefur verið að vinna með þróunaraðilum sem vilja byggja hagkvæmt húsnæði undanfarið ár og bauð fram sérstakar lóðir fyrir hagkvæmt húsnæði. Það er búin að vera vinna í gangi síðastliðið ár þar sem öllum sem áhuga höfðu bauðst að koma með hugmyndir inn í samkeppni á nokkrum reitum í borginni. Nú á að ganga til samninga við þrjá þeirra aðila og fimm til viðbótar fá átta vikna frest til að ganga frá fjármögnun.
Sjá frétt hér: https://reykjavik.is/frettir/odyrari-ibudir-fyrir-ungt-folk-og-fyrstu-kaupendur
Þetta samtal var gírað inn á að fá nýjar og ferskar hugmyndir til framkvæmda en aðallega að minnka húsnæðiskostnað svo yngra fólk gæti keypt nýjar eignir eða leigt á fyrirsjáanlega hagstæðu verði. En það er áhugavert að byggingaverktakar með reynslu eru ekki áberandi meðal þeirra sem sækja um og þeir sem eru með virðast ekki vera leiðandi í verkefnunum. Stærstu verktakar landsins eru að mestu fjarverandi. Af rýni á upprunalega hópnum þá eru það MótX og Ístak sem hafa tekið þátt. Ístak er tilgreint sem þátttakandi í tveimur hópum: Þorpinu vistfélagi sem fær að líkindum úthlutað lóð á Gufunesi og hóp sem Heimavellir voru í forsvari fyrir en hafa gefið verkefnið frá sér. MótX er í hópnum Vaxtarhús sem hefur fengið úthlutað lóð við Sjómannaskólann. Hvernig skyldi standa á að þróunardeildir helstu verktakanna séu ekki virkir í samkeppnum af þessu tagi? Ein skýringin er bara algert áhugaleysi á nýsköpun. Önnur er að þeir sjái ekki vit í að keppa við mikið til óreynda aðila sem hugsanlega hafi óraunhæfar fyrirætlanir um sparnað. Kannski er það blanda af hvoru tveggja.
Það er allavega þekkt að tæki og þekking byggingaverktaka læsa þá inni í tiltekinni framleiðsluaðferð sem hefur töluverðan þröskuld að komast yfir eigi að breyta um tækni. Áhættan í hverju verkefni er mikil og oft er hagnaðarhlutdeild mjög lítil sem gerir fjárfestingu í nýrri tækni að áhættu sem gæti fellt fyrirtækið ef fjárfestingin er samhliða erfiðu verkefni eða verkefni sem kemur í sölu í verðlægð. Hagkvæmari strategía er að ná yfirhönd á tilteknum staðbundnum markaði og sjá til þess að aðrir komist ekki svo glatt inn á markaðinn og byggja eins ódýrt og mögulegt er með þekktum aðferðum. Það er meðal annars fjallað um þetta í þessari skýrslu frá IPPR í Bretlandi árið 2012.
Meðal lausna er að sveitarfélög opni upp markaðinn fyrir lóðir og greiði leið nýrra fyrirtækja á markaðinn. Það verður áhugavert að sjá hvort tilraun Reykjavíkurborgar skili byggingariðnaði í borginni breytingum og endurnýjun.
🏗️Fyllt inn í gamla verslunarkjarna
Breytingar á gömlum verslunarkjörnum í hverfum borgarinnar eru nokkuð sem má búast við að sjá mun meira af og hefur verið í gangi um skeið. Af nokkrum sem ég man eftir að hafa sótt skipulagsbreytingar eru Kron við Dunhaga, Suðurver við Hamrahlíð, Rofabær 7-9 og Rofabær 39, Verslunarmiðstöð við Arnarbakka. Framkvæmdir hafa þegar orðið við Grímsbæ, Skipholt 70 (á horninu við Háteigsveg), Glæsibæ. Eflaust er margt fleira sem mætti nefna. Það væri reyndar gaman að taka saman þessar breytingar með myndum.
Mynd af verslunarkjarnanum við Skipholt þar sem skrifstofum á annarri hæð var breytt í íbúðir og íbúðum bætt ofan á. Að mínu mati hefur tekist vel til. Fasteignasalan Trausti er með tvær íbúðir til sölu í húsinu skv fasteignavef Mbl.
Nú er einnig verið að breyta verslunarkjarna við Hólmgarð rétt ofan við Grímsbæ. Ég þekki þessa byggingu vel því ég labbaði framhjá daglega á leið minni í Réttó og það var oft hangið þarna í kring. Fyrir meira en 20 árum var þetta sem sagt að mestu yfirgefið of vannýtt. Við unglingarnir í hverfinu létum okkur dreyma um að þetta yrði að einhverju skemmtilegu í hverfinu okkar. Nú er þetta að verða að veruleika og mér sýnist af frétt Vísis að það sé verið að gera þetta á mjög skemmtilegan hátt og passað að breytingin taki mið af umhverfi sínu.
Mynd úr frétt Vísis. Sjá frétt Vísis um verkefnið.
🌳Garður ber nafn
Handan við götuna frá verslunarkjarnanum við Hólmgarð er lítill almenningsgarður. Okkur unglingunum fannst þetta ekki mjög tilkomumikill garður, sparlega útbúinn og hálf umkomulaus þarna. Hann fékk viðurnefnið Rússneski lystigarðurinn í takt við hugmyndir okkar um almenningsrými í Rússlandi en stjórnartíð Borisar Jeltsíns stóð hæst um þær mundir. Það kemur þó á daginn að garðurinn heitir Garðaflöt í reynd. Hann var meira að segja fyrsti almenningsgarðurinn í úthverfum Reykjavíkur, vígður á kaupstaðarafmæli Reykjavíkurborgar 1960. Þetta má lesa í stórgóðu riti Braga Bergssonar, starfsmanns Reykjavíkurborgar um almenningsgarða í Reykjavík, sem gefið er út af Borgarsögusafni.
Séð inn á Garðaflöt að sunnan. Svæðið hefur sjaldan verið mikið notað.
🧊🧊🧊
Hótelíbúðir sækja í sig veðrið
Afkoma hótelíbúða er með betra móti borið saman við hefðbundin hótelherbergi á meginlandinu segir í samantekt HVS.
Það er áhugavert að sjá að í Reykjavík eru 50 hótelíbúður í pípunum samkvæmt úttekt Morgunblaðsins á uppbyggingu hótelrýma. Alls er spáð fjölgun herbergja um 570 til áramóta.
https://www.mbl.is/frettir/innlent/2019/07/25/fjoldi_nyrra_hotela_i_notkun/
Ég er búinn að vera að skoða fasteignaauglýsingar með það fyrir augum að sjá hvort íbúðir sem hafi verið keyptar gagngert til skammtímaútleigu séu að skila sér til sölu eftir að farið var að framfylgja lögum um skammtímaleigu. Það eru greinilega einhver dæmi um það en erfitt að segja hvort það sé einhver breyting. En það er sannarlega spurning hvort hótelíbúðin, sem getur oft rúmað fleiri en tvo og er því hagstætt fyrir ferðalanga eigi eftir að leika stærra hlutverk í Reykjavík og hvort öllum hótelum takist að komast yfir minni nýtingu en verið hefur.
Berlín kaupir íbúðasafn
Það vakti athygli að Berlínarborg hefur ákveðið að kaupa aftur tæplega 700 íbúðir sem einkafjárfestir hafði keypt á 10. áratugnum og koma í hendur húsnæðisfélagsins Gewobag sem borgin á. Það verður áhugavert að sjá þessari frétt fylgt eftir og hvort þessi ráðstöfun skili sér í hagstæðari leigu eða ekki.
Ef þú vilt segja mér hvað þér finnst um það sem ég er að skrifa, spurja spurninga eða leggja eitthvað til þá er einfaldast að svara bara þessum pósti.
Ef þú heldur að einhver sem þú þekkir hefði áhuga á að lesa þetta þá er best að framsenda bara póstinn til viðkomandi.
Svo er hægt að gerast áskrifandi hér: